شوية رومانسية على الماشى كل يوم

احنا ليه مش بنهدى عصابنا؟

ليه شايفين كل حاجه عصبيه ونرفزة وزهق وخنقه ونكد ؟

الحياة حلوة ومحتاجه مننا نعيشها ونتمتع بيها تعالوا اقولكم نعمل ايه علشان نهدى اعصابنا شوية

نقوم من نومنا نبتسم حتى لو لنفسنا فى المرايه وحتى لو منغير سبب علشان نروق ونهدى
نقول كل يوم الحمدلله اننا لسه عايشين وبنحب وف قلوبنا مشاعر حلوة لكل الى بنعرفهم
ننسى خالص اى هم هنقابله فى يومنا الطويل
كل خمس دقايق كدا نحاول نسترخى وسط زحمه الشغل والدراسه ونتفائل ان لسه اليوم مخلصش واكيد الى جى احلى
نغير نغمات موبيلاتنا لنغمات هاديه تريح اعصابنا وتروقنا او لاغنيه ليها زكرى حلوة عندنا ونشيل خالص الاغانى الحزينه
نهتم بروحنا دقيقه او دقيقتين كل ساعه علشان نجدد مظهرنا وشكلنا ونسترخى
نبعد عن الصوت العالى حتى لو جت المشاكل لحد عندنا
اول ما نعدى على اى محل ورد ف الشارع نشترى وردة ونفضل ماشيين مستمتعين بنضارتها وعطرها
اول ما نروح البيت نقابل اهلنا بحب وفرحه وننسى كل همومنا الى شوفناها برا علشان منكمل اليوم نكد
نحدد وقت نخرج فيه او نستريح شوية من الارهاق او حتى نعمل اى حاجه جديده تكسر حاجز الملل والزهق
نغير فى لبسنا واماكن جلوسنا وحتى المشروبات الى متعودين عليها علشان نحس بتجدبد
ممكن نغير الكوبايات الى بنشرب فيها والاطباق واى حاجه نحس انها بقت تقليديه
هدومنا نفسها نعمل فيها تجديد وندخل الوان جديده فيها بهجه وفرحه تغير من شكلنا
نعمل رياضه خفيفه حتى لو كانت اى هبل او ممكن نرقص على اغنيه بنحبها علشان نحس بنشاط
لو ركبتم مواصلات واندمجتم مع اغنيه وانتوا قاعدين ايه المانع ولو سمعتم نكته من حد متعرفهوش ايه المانع
من الاخر عايزة اقولكم عيشوا ببساطه واملو حياتكم الوان وبهجه وفرح وسعادة بابسط الاشياء الى بتمر عليكم كل يوم وجددوا حياتكم ونشاطكم دايما
عايزة اقولكم كمان ان الرومانسيه مش حب واغانى وبس الرومانسيه هدوء اعصاب وراحه بال وحب لكل الى تعرفهم ، الرومانسية ورده حلوة نشم عطرها ونتمتع بيه فخلى حياتك كلها ورد ملون نطير جواه و نستمتع بمنظره ونقول الحمدلله على نعمه الحياة

لو عملنا كده الحياة هتبقى بمبى اوى لزما يبقى فيه شوية نكد كده عشان نحس بطعم الحياة ههههههه
مرسى على التوبيك الروعة ده

متستعجلش على النكد لانه بيجى لوحده ودايما دور على راحه البال والنجاح والهدوء صدقنى برضو هتحس بطعم الحياة لان احيانا القلق بيبوظ علينا لحظات حلوة كتير خلينا عايشين فى صفاء ونقاء حتى ولو لمدة ساعة واحده